估唔到 C AllStar 會用 Minecraft 嚟搞虛擬演唱會

其實我一開始睇到呢個新聞嗰陣,我覺得個 idea 係幾好嘅。但諗深一層,其實要喺 Minecraft 搞虛擬演唱會喺實行上係有唔少困難。

(封面圖:Virtual HKC

2017 年 10 月,C AllStar 於「生於 C AllStar 演唱會 2017」上宣佈正式休團,之後四人便積極發展個人音樂事業。三年後,在 C AllStar 出道 10 週年的 2020 年,他們將會限定重組,於「Make It Happen @ 10 音樂會」上為歌迷送上驚喜!

Make It Happen @ 10 – C AllStar Virtual Live 官方網站

伺服器可以容納嘅觀眾人數有限

喺近年嘅 Minecraft 版本,架設可以容納大量玩家嘅伺服器所需嘅硬件要求越嚟越高。呢個就係點解大型小遊戲伺服器一般都會用「群組式」嘅伺服器架構嘅原因,佢哋每個遊戲房間都係一個獨立嘅伺服器,咁就可以減輕每個伺服器嘅壓力。

最近 YouTuber SalC1 上載咗條片,咁啱佢就係探討呢個問題。另外佢亦解釋咗點解 2b2t 伺服器最近呢 3 年都冇辦法增加最大玩家數量、同埋升級上最新嘅 Minecraft 版本。

YouTuber SalC1 最近上載咗條片,解釋 2b2t 伺服器點解冇辦法增加最大玩家數量、同埋升級上最新嘅 Minecraft 版本。

原版 Minecraft 冇辦法串流音樂

其實玩家人數上限唔係喺 Minecraft 搞演唱會最大嘅問題,冇辦法串流音樂先係。原版 Minecraft 嘅通訊協定係唔支援串流音樂,最多都淨係可以用「named sound effect」封包嚟指示客户端播放音效,不過我諗都兩個或者可以嘅解決方法:

Plugin Channels

人數少(即係得幾個人)嘅話理論上可以用 plugin channels 嚟傳送聲音,再由客戶端播返出嚟。不過我估呢個方法會有唔少問題:同時播畀太多人會塞爆頻寬、聲音太長亦都(應該)會塞爆頻寬。

HLS 客户端

對比上面嗰個,我諗呢個方法會行得通。開發一個 HLS 客户端嘅 Minecraft 模組,跟住連線去一個串流伺服器。呢個方法除咗可以承受更多聽眾嘅數量,亦都唔使驚會塞爆個 Minecraft 伺服器(因為兩個伺服器係分開嘅)。至於 HLS 伺服器嘅選擇,我諗呢度應該有唔少適合而且係開放原始碼嘅,任君選擇。


不過點都好啦……為咗一探究竟,我特登買咗飛(以身試伏),希望可以了解到佢點樣解決我上面所講嘅問題啦!

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x